VICHWA VYA HABARI BAADHI YA MAGAZETI YA TANZANIA.

 

MADAKTARI KUJADILI HALI YA DR ULIMBOKA

WAKATI kukiwa na taarifa za kurejea nchini kwa Mwenyekiti wa Jumuiya ya Madaktari, Dk Steven Ulimboka viongozi wa Jumuiya hiyo na Umoja wa Madaktari Tanzania (MAT), wanatarajia kukutana leo kujadili mkanda mzima wa sakata lililomkumba kiongozi huyo.  Baada ya kikao hicho, madaktari hao watakutana na familia yake na kisha kumuuliza Dk Ulimboka kama angependa kilichomtokea kiwekwe wazi kwa jamii.

 Dk Ulimboka ambaye alikuwa anaratibu mgomo wa madaktari uliokuwa ukiendelea nchi nzima, alitekwa na watu wasiojulikana usiku wa kuamkia Jumatato ya Juni 27 mwaka huu na kupelekwa katika msitu wa Pande, nje kidogo ya Jiji a Dar es Salaam, ambako aliteswa na kujeruhiwa vibaya.

Katika tukio hilo daktari huyo aling’olewa meno mawili na kucha za mkono mmoja na baadaye kulazwa katika Kitengo cha Wagonjwa Wanaohitaji Uangalizi Maalum (ICU) katika Taasisi ya Mifupa (MOI).  Baada ya hali yake kuzidi kuwa mbaya Juni 30 mwaka huu, alisafirishwa kwenda Afrika a Kusini kwa ajili ya vipimo na matibabu.

 Kusafirishwa kwake kulifuatia taarifa ya jopo la madaktari lililokuwa linamhudumia kutoa taarifa kwa madaktari bingwa kuhusu abadiliko ya afya.

 Taarifa za kurejea kwa Dk Ulimboka zimezagaa katika mitaa mbalimbali jijini Dar es Salaam, huku baadhi ya watu wakizijadili katika mitandao ya kijamii.  Akizungumza na gazeti hili Katibu wa Jumuiya ya Madaktari Tanzania, Dk Edwin Chitage, alisema kuwa hali ya Dk Ulimboka inazidi kuimarika lakini alisita kueleza wazi ni lini kiongozi huyo wa madaktari atarudi nchini.

 “Tukiwa tayari tutatoa taarifa katika vyombo vya habari juu ya suala zima la afya ya Dk Ulimboka,” alisema Dk Chitage.  Alisema leo au kesho viongozi mbalimbali wa MAT na Jumuiya ya Madaktari, watakutana kujadili suala la kiongozi huyo.

 “Ndani ya siku mbili hizi (leo na kesho) viongozi tutakutana na kujadili ripoti ya matibabu ya Dk Ulimboka na tutajadili kama tuvieleze vyombo vya habari ama laa,” alisema Dk Chitange.  Hata hivyo Dk Chitange alisema hatua hiyo itategemea na kauli ya familia ya Dk Ulimboka na  yeye mwenyewe (Dk ULimboka) kwa kuwa na wao pia watashirikishwa.

 “Dk Ulimboka na familia yake tutawashirikisha katika mambo ambayo tutayajadili,” alisema Dk Chitage.  

    Alipoulizwa kama kiongozi huyo wa madaktari sasa anaweza kufanya shughuli zake kama awali, alisema hana uhakika kwa kuwa hana taarifa za ndani zaidi 

.mshuwa.blogspot.com

MISRI YAFANYA MASHAMBULINZI

                                               Wanajeshi wa Misri tayari kwa mashambulizi

 Helikopta za kijeshi za Misri zimerusha makombora kwa wapiganaji wanaoshukiwa kuwa wa kundi la kiislamu eno la rasi ya sinai kaskazini mwa Misri.

Watu ishirini wameripotiwa kuuawa katika kijiji cha Touma wakati eneo la Sheikh Zuwaid nalo lilishambuliwa.

Mashambulizi hayo yamekuja baada ya vituo vya ukaguzi wa usalama kushukiwa kushambuliwa na watu wenye silaha katika mji wa al-Arish na kuwaua watu kadhaa.

Siku ya Jumapili wapiganaji waliwaua askari wa mpakani kumi na sita wa Misri katika eneo hilo.

Baada ya shambulio hilo zito dhidi ya vikosi vya Misri katika eneo la mpaka kuwahi kutokea kwa karne kadhaa, vikosi vya Israeli vilimesema viliwaua baadhi ya wapiganaji walioingia Israeli.

Mpaka wa Rafa

Waandishi wanaripoti kuwa, kumekuwa na ongezeko la majeshi kuzunguka eneo la al-Arish na mpaka wa Misri wa Rafar kuingia Gaza umefungwa moja kwa moja wakati vikosi vya ulinzi vikiwasaka washambuliaji waliosalia.
Hii ni mara ya kwanza kwa Misri kurusha makombora eneo la Sinai toka vita dhidi ya Israel mwaka 1973 ilipojaribu kuichukua rasi ya Sinai, maafisa wa usalama wameviambia vyombo vya habari.
Uwepo wa majeshi ya Misri eneo la Sinai kunahitaji idhini ya Israeli kwa mujibu wa makubaliano

KEITA AONDOKA BARCELONA

Mchezaji  kiungo wa Mali Seydou Keita ameihama klabu cha Barcelona baada ya kukichezea kwa miaka minne.

Katika muda huo wa miaka minne, Keita aliisaidia Barcelona kuzoa jumla ya vikombe 14.

Wakati wakithibitisha kuondoka kwa mwamba huyo, Barca walimishukuru Seydou Keita kwa juhudi zake za kuletea klabu hicho cha Uhispania mafanikio na vile vile wakamtakia kila lakheri anakokwenda.

Kwa wakati huu kuna fununu kwamba mchezaji huyo wa Mali huenda anahamia klabu kimoja cha Uchina, Dalian Aerbin

Ikiwa hatiamae ataishia China basi Keita hatakuwa mchezaji wa kwanza kutoka bara la Afrika kufanya hivyo.

Majuzi nahodha wa timu ya Ivory Coast Didier Drogba aliwafuata Frederic Kanoute na Yakubu Aiyegbeni wa Nigeria kujiunga na timu za ligi kuu ya China.

Keita, mwenye umri wa 32, alijiunga na Barcelona mwaka 2008 kutoka Sevilla akiwa ni mchezaji wakwanza kabisa ambaye Pep Guardiola alimsajili mara tu alipochukuwa uongozi wa Barca.

Kabla ya hapo mchezaji huyo alikuwa Olympic Marseille, Lorient na Lens zote za Ufaransa na ndio baadaye akahima Seville ya Uhispania.

Keita amehama baada ya Guardiola Kuondoka kama Meneja wa Barcelona na mahali pake kuchukuliwa na aliyekuwa naibu wake Tito Vilanova

NTC yatoa madaraka kwa Congress, Libya

                                        Mustafa Abdel Jalil akikabidhi maraka nchini Libya

 Serikali ya mpito nchini Libya imekabidhi madaraka ya kulitawala taifa hilo kwa baraza la Congress lililobuniwa baada ya uchaguzi mkuu wa mwezi uliopita , ikiwa ni hatua muhimu katika kipindi cha mpito katika siasa za taifa hilo.

Mziki wa wa bendi ya jeshi ulichezwa kuwakaribisha wanasiasa na maafisa wa ngazi ya juu katika jeshi waliokuwa wakiwasili tayari kwa sherehe hizo.

Kisha serikali ya mpito nchini Libya ikakabidhi madaraka kwa baraza la Congress ambalo lilibuniwa baada ya uchaguzi wa hivi maajuzi.

Hafla yenyewe ikajawa na taswira ya mwamko mpya katika mji mkuu wa Tripoli.

Hafla hii inaashiria hatua za mpito katika siasa za Libya kutoka utawala wa ki-imla hadi utawala wa kidemokrasia wenye viongozi waliochaguliwa.

Hii haingetokea kama Kanali Muamar Gaddafi angekuwa bado madarakani, wengi wanaamini.

Serikali ya mpito inayovunjwa iliwajumuisha wanamgambo wa upinzani waliomng'oa madarakani na kisha kumuua kanali muamar Gadaffi mwaka mmoja uliopita.

Mustafa Abdel Jalil mwenye kiti wa baraza la kitaifa lililoendesha serikali hiyo ya mpito akihutubu wakati wa sherehe hizo za kukabidhi madaraka, amesema baraza la Congress ndilo pekee lenye haki ya kikatiba kuwaakilisha raia wa Libya.

Waandishi wanasema ingawa kuna utulivu katika mji mkuu, Tripoli, mapigano yanaendelea katika maeneo mengi ya Libya.
Baadhi ya makundi ya wanamgambo yangali yanashikilia madaraka makubwa.

MGOMO WA WALIMU NI SAWA NA TEMBO WAWILI WANAPOPIGANA, ZIUMIAZO NYASI

                                  Rais Chama cha Walimu nchini (CWT) Gratian Mukoba.

TUNAMUOMBA Mungu atuepushie balaa ya mfarakano na atutie nguvu ili tuzidi kushikamana.

NDUGU zangu, wiki  nzima iliyopita nchi imejikuta ikitikisika kutokana na mgomo wa walimu uliotanda  sehemu mbalimbali nchini  wakiishinikiza serikali kuwalipa stahiki zao, huku ukiathiri sekta ya elimu katika ngazi za shule za msingi na sekondari za umma kwa kiasi kikubwa.

Kutokana na taarifa mbalimbali ukweli ni kwamba katika sehemu nyingi za nchi walimu waligoma kuingia madarasani na wengine walifika tu kazini na kusaini vitabu vya mahudhurio kisha kuondoka. Kama mzazi, hii inauma sana!

Inauma kwa sababu watoto wetu wanakosa elimu na wengine wapo darasa la saba huku wengine wakiwa kidato cha nne au cha sita, wote siku zijazo watafanya mitihani bila kujali kama walikuwa wakifundishwa au la.

Wahenga walisema tembo wawili wapiganapo, ziumiazo nyasi. Ndivyo ilivyo, walimu na serikali wanapogombana watakaoumia ni wanafunzi. Ni wazi wengi watafeli mitihani yao kwani watakuwa nyuma ya silabasi.

Cha ajabu ni kwamba licha ya walimu kugoma, wanafunzi katika baadhi ya shule za msingi walifanya maandamano kupinga hatua hiyo.

Wengi walionekana katika vyombo vya habari wakiandamana na kupiga kelele wakisema mgomo huo ulikuwa unawanyima haki yao ya msingi ya kupata elimu.

Picha za luninga na magazeti zilionyesha madarasa katika baadhi ya shule yakiwa matupu au yakiwa na wanafunzi lakini bila kuwapo walimu. Picha nyingine zilionyesha wanafunzi wakiwa madarasani wakifundishwa na wenzao waliochukua nafasi za walimu wao.

   Wengi tunajiuliza, nani aliwahamasisha wanafunzi hao kufanya maandamano nchi nzima? Ni swali gumu la kitendawili ambacho huenda itakuwa vigumu kukitegua katika siku zijazo kwani halihitaji majibu mepesi.
Kinachonishangaza mimi bila shaka na Watanzania wengine ni hatua ya jeshi la polisi kumwaga askari wenye silaha za moto barabarani kukabiliana na watoto hao wa shule waliokuwa wakiandamana.

Ilisemwa kuwa walikuwa wakielekea katika ofisi za mamlaka husika kupinga mgomo huo ambao Chama cha Walimu Tanzania (CWT), kimesema hautakuwa na kikomo.

Tuliona katika magazeti  baadhi ya polisi wakitumia nguvu kupita kiasi kuwakamata wanafunzi hao kama wanavyofanya wanapowakamata majambazi wenye silaha za moto au za kivita.

   Hapa ndugu zangu natoa ushauri wa nini kifanyike licha ya serikali kujiona imeshinda mahakamani dhidi ya walimu, warudi katika meza ya mazungumzo kwa lengo la kupata maridhiano.
Kwanza, niseme wazi kuwa walioishauri serikali kupeleka suala hilo mahakamani hawakutumia busara kwa kuwa lilikuwa bado linazungumzika.

Kusema kweli haitoi picha nzuri hata kidogo kwa serikali kukimbilia mahakamani kila inapoingia katika migogoro na wafanyakazi na haipaswi kuiona mahakama kama kimbilio pekee kila wakati Tume ya Usuluhishi na Uamuzi  inaposhindwa kutatua mgogoro katika muda mfupi.
Sehemu nyingi duniani tumekuwa tukiona kwamba utatuzi wa migogoro unahitaji uvumilivu na subira kubwa kwa pande zinazopatanishwa.

 Msisitizo hapa ni kwamba, mchakato mzima wa kumaliza mgogoro wowote ule unahitaji kuvumiliana, kusikilizana na kuheshimiana. Kwa maana ya kila upande kujaribu kuelewa hoja za mshindani wake.
Lakini pia kila upande katika mgogoro unatakiwa  kutambua na kukubali ukweli kuwa, katika mapatano ya usuluhishi hakuna upande unaoweza kupata kila kitu unachotaka.

 Kwa mfano, katika mgogoro huu ulio mbele yetu, walimu lazima waelewe kwamba hawawezi kuongezewa mshahara kwa asilimia 100 kama wanavyotaka.

Kwa mtu anayefikiri kwa kina na kutafakari mambo, atagundua utamaduni wa serikali kukimbilia mahakamani badala ya kutafuta maridhiano na wafanyakazi ni uthibitisho kwamba sheria za kazi zina mapungufu makubwa.

 Kwa mfano, inakuwaje Kifungu cha 83(4)g cha Sheria ya Ajira na Mahusiano Kazini Namba 6 ya mwaka 2004 itamke kwamba mwajiri hatalazimika kulipa mshahara kwa mtumishi aliyeshiriki katika mgomo, hata pale ambapo chama cha wafanyakazi kitakuwa kimefuata sheria na taratibu zote za kutangaza mgomo?

   Katika sakata la mgogoro huu serikali imesema mgomo wa walimu uliokuwa ukiendelea ni batili kwa sababu shauri lake lilikuwa mahakamani.

Kwa tafsiri na wasomi na watu wanaotafakari mambo mazito ni kwamba  pengine kitendo cha serikali kukimbilia mahakamani kuzuia wafanyakazi wasitekeleze haki yao ya kugoma baada ya kufuata sheria na taratibu zote zilizowekwa ni matumizi mabaya ya mhimili huo wa dola maana sheria ni msumeno.

Njia pekee ya kumaliza mgogoro ni wizara ya elimu chini ya Waziri Dk. Shukuru Kawambwa kukaa meza moja na CWT chni na kiongozi wao, Gratian Mkoba kujadiliana. Hata watu wanaopigana vita hufanya hivyo, kwa nini serikali na CWT washindwe?   Jipu limepasuka, siwezi kuwa adui kwa kusema ukweli.

PAPAA MSOFE AFIKISWA KWA IGP MWEMA

                                                                  Papaa Musofe


MARY Kituli (40), mkazi wa Jiji la Dar es Salaam amedai kuwa maisha yake yapo hatarini tangu marehemu mumewe, Chasphori Kituli auawe kwa kupigwa risasi nyumbani kwake, Magomeni Mapipa wilayani Kinondoni, hivyo kuamua kulifikisha sakata hilo kwa Mkuu wa Jeshi la Polisi nchini, IGP Said Mwema.
 
Mjane huyo ameliambia gazeti hili mwishoni mwa wiki iliyopita kuwa amemuomba IGP Mwema kumpa ulinzi kutokana na hofu hiyo kwa kuwa amekuwa akipata vitisho kama alivyovipata mumewe kabla ya kuuawa.

Kwa mujibu wa Kamanda wa Polisi wa Mkoa wa Kipolisi wa Kinondoni, ACP Charles Kenyela, polisi wanamshikilia Marijani Abubakari maarufu kwa jina la Papaa Msofe kutokana na mauaji hayo.
Akizungumza kwa njia ya simu akiwa mafichoni na mwandishi wa habari hii, Mary ameeleza kwamba vitisho vimekuwa vingi, jambo ambalo linampa hofu kubwa na kuamua kujificha.
Mary aliendelea kusimulia mkasa mzima kuhusiana na misukosuko iliyowapata kuanzia mumewe alipouawa hadi sasa kama ifuatavyo:

“Marehemu mume wangu alikuwa mfanyabiashara na alikuwa akimiliki migodi Mererani, Arusha. Tulikuwa tunaishi Mikocheni A na watoto wetu wawili.

“Nakumbuka mgogoro uliokuwepo ni baina ya mume wangu na mfanyabiashara mmoja maarufu nchini (jina linahifadhiwa) ambaye alidai kwamba amempa marehemu Sh. milioni 30, akasema akishindwa kurudisha atachukua nyumba yetu iliyopo Mikocheni.

“Tukasikia kuwa nyumba yetu hiyo baadaye alimuuzia Papa Msofe lakini sisi hatukuweza kuhama kwa kuwa makubaliano hayakuwa hivyo.

“Oktoba 2007 tulivamiwa nyumbani hapo na watu tunaowafahamu, wakachukua vitu mbalimbali likiwemo gari aina ya Range Rover pamoja na bunduki aina ya shotgun. Vitu hivyo hatujavipata hadi leo.

“Kufuatia kitendo hicho tuliamua kuhamia Magomeni Mapipa huku tukiendelea na kesi ambayo mume wangu aliifungua baada ya kutokea kwa tukio hilo. “Ilipofika Oktoba 3, mwaka jana mume wangu aliendelea kupata vitisho, wanafamilia tukaingiwa na woga.

“Ilipofika Oktoba 6, 2011, mume wangu akiwa ndani ya gari kwenye geti la nyumba yetu ya Magomeni Mapipa akitokea kazini, alipigwa risasi. Mimi nilikuwa China na nilipoambiwa nilipatwa na mshituko mkubwa, nilijaribu kuwasiliana naye ikashindikana.

“Niliambiwa baadaye kuwa mume wangu alikimbizwa Hospitali ya Taifa ya Muhimbili lakini hakufika kwani alifia njiani. Nilirudi nchini Oktoba 8, mwaka jana na tukachukua mwili na kwenda kumzika mkoani singida.

MKE WA DR SLAA ATEGEWA FUMANIZI.

 
 KUNA taarifa kwamba mke wa Dk. Wilbroad Slaa, Josephine Mushumbusi ametengenezewa mtego ili afumaniwe na mume wa mtu.
 
Vyanzo vyetu vya habari vimesema kuwa mpango huo wa fumanizi umeandaliwa na chama kimoja cha siasa (jina tunalihifadhi) ili kumharibia Josephine na mumewe ambaye ni katibu mkuu wa Chadema katika medani ya siasa.

Mtoa habari wetu alibainisha kuwa maandalizi ya mpango huo yanafanyika Dodoma ambako kumekuwa na mikutano kadhaa ya wahusika ambapo mikakati inapangwa ya jinsi ya kumfumania na mume wa mtu ambaye tayari ameandaliwa na kuahidiwa kitita kikubwa cha fedha.

Habari zinasema kundi hilo limetengewa kiasi kikubwa cha fedha kwa ajili ya operesheni hiyo maalum inayoongozwa na kada wa chama kimoja ambaye jina lake linaanzia na herufi M.
Imeelezwa kuwa mume wa mtu aliyepatikana ameanza kazi kwa kumtumia Josephine ujumbe wa kimapenzi katika simu huku akimuahidi kitita kikubwa cha fedha.

“Huu ni mkakati wa kisiasa nia ikiwa ni kuwamaliza Dk. Slaa na mkewe katika ulingo wa siasa kwani Josephine akinasa basi umaarufu wa mumewe utakuwa umekwisha. Lakini habari hii siyo siri tena na waliopanga mpango huu wana hali tete baada ya kujua kuwa njama zao zimegundulika,” alisema mtoa habari wetu.

Gazeti hili lilipopata taarifa hizi liliwasiliana kwa njia ya simu na Josephine na alipoulizwa kama anajua chochote kuhusu mpango huo alikiri kufahamu.
“Ni kweli mpango huo upo na nimekuwa nikipokea SMS nyingi za kimapenzi na nimemuonesha Dk Slaa,” amesema Josephine juzi Jumapili.

Hivi karibu wakili maarufu nchini, Mabere Marando aliwahi kulalamika akidai kuna mtambo wa mawasiliano ambao umeingizwa nchini kinyemela ambapo mtu unaweza kutumiwa ujumbe mfupi wa maneno kwa kutumia kifaa hicho, hali ambayo imesababisha watu mbalimbali waliozungumza na gazeti hili kudai kuwa inawezekana ndiyo unaotumika kumsumbua Josephine.

Nalo jeshi la polisi nchini, lilipoulizwa na gazeti hili kuhusu madai hayo, limesema linaendesha uchunguzi wa madai ya Marando.

Msemaji wa jeshi hilo, Advera Senso alisema baada ya madai hayo kutolewa, jeshi hilo, kupitia Kitengo cha Simu na Ufuatiliaji, limeanza kazi ya kuchunguza ukweli wa mashine hiyo na kama kweli kuna anayefanya kitendo hicho, hatua kali sana zitachukuliwa.

“Taarifa za kuwapo na mtambo wa kuingilia mawasiliano ya simu ya mtu mwingine zimetufikia, tunachunguza kwa ukaribu, tunajua suala hili lilianzia bungeni na sasa lipo ndani ya jamii. Kuingilia mawasiliano ya mtu mwingine bila ridhaa yake ni kosa la jinai, sasa tusianze kuhukumu kitu ambacho hatuna uhakika nacho, tusubiri kazi ya uchunguzi ikamilike,” alisema Senso.

AUA MKEWE NA KUMLA NYAMA

                                               Mtuhumiwa wa mauaji, Jiemng Liu.

BABU mmoja mwenye umri wa miaka 79, Jiemng Liu  ameshitakiwa mahakamani nchini Uingereza kwa kosa la kumuua mkewe na kumla nyama yake.
 
Mwendesha mashitaka katika mahakama moja ya Wilaya ya Westbrough nchini humo aliiambia mahakama hivi karibuni kuwa Liu alikutwa ameketi kwenye kiti cha magurudumu katika makazi yao Mtaa wa Shrewsbury akiwa ametapakaa damu ya mke wake aitwae Yuee Zhou (73) mdomoni, mikononi na puani ambaye alikuwa amemuua.

 Liu tayari ameshitakiwa kwa kosa la mauaji ya mkewe huyo. Akiwa katika mahakama hiyo ya wilaya, babu huyo alifikishwa mahakamani akiwa amevaa pajama nyeupe na miguuni akitembea pekupeku.

Hata hivyo, kutokana na madai kuwa alikutwa akiwa amemuua mkewe na akawa anakula nyama yake, mahakama iliamuru apelekwe hospitali ya magonjwa ya akili ili akapimwe ubongo wake kama yupo sawasawa au la kabla ya kuanza kusikilizwa kwa kesi yake.

MKAPA NA SIRI ZA FREEMASON.

 RAIS Mstaafu wa Tanzania, Benjamin Mkapa anaongozwa kwa kualikwa katika hafla mbalimbali zinazofanywa na jamii ya siri (secret society) ya Freemasons, hali inayoonesha kuwa huenda ana siri nyingi za taasisi hiyo, Uwazi limegundua.

Kwa mujibu wa mtandao wa kiongozi wa muda mrefu wa jamii hiyo, Jayantilal Kashavji Chande almaarufu Sir Andy Chande, picha nyingi za Mkapa zimewekwa katika mtandao huo na kuelezwa kile alichokuwa akifanya akiwa na kinara huyo wa Freemasons Afrika Mashariki.

MIAKA 100 YA FREEMASONS
Katika sherehe ya jamii hiyo ya kutimiza miaka 100 tangu waingie Afrika Mashariki iliyofanyika jijini Dar es Salaam Oktoba 9, 2004, Mkapa alialikwa na kuwa mgeni rasmi na sherehe hiyo ilifanywa kwa siri kubwa. Gazeti hili limegundua kuwa Sir Andy Chande katika mahojiano yake na mwandishi mkongwe nchini, Ernest C. Ambali aliyekuwa akiandikia Gazeti la The Guardian, lililokuwa mitaani Oktoba 8, 2004 hakueleza mahali patakapofanyika sherehe hizo jijini Dar es Salaam lakini alitaja waziwazi kuwa mgeni rasmi angekuwa Rais (wakati huo) Benjamin Mkapa ambaye angefuatana na mkewe mama Anna Mkapa.
Hata hivyo, wakati anasimikwa Chaim Henry Gehl kuwa kiongozi wa Freemasons Israel, ilitajwa kuwa sherehe hizo zingefanyika katika Hoteli ya Royal Palm jijini Dar es Salaam ambapo wageni 350 walihudhuria.

MKAPA, SIR CHANDE UGANDA
Mkapa ameonekana katika picha akiwa na Sir Chande nchini Uganda walipotembelea Kiwanda cha Sukari cha Kakira wakati huo akiwa madarakani mwaka 2005. Haikuelezwa kwa nini walitembelea kiwanda hicho.
Sir Andy Chande katika kudhihirisha kuwa ni marafiki na Mkapa, alimpa nafasi katika kitabu chake kuandika utangulizi ambapo rais huyo mstaafu amesema kazi anazofanya mfuasi huyo wa Freemason kwa jamii ni nzuri.

Aidha, Mkapa amebainisha kuwa mara baada ya kufahamiana na mzee Chande, alimteua kuwa mjumbe wa bodi ya Shule ya Shaaban Robert jijini Dar es Salaam na kufanya naye kazi kwa karibu na ndipo alipoelewa zaidi shughuli za Freemasons ambazo ni za kusaidia jamii.

“Mkapa amekuwa akihudhuria hafla nyingi za Freemasons tangu akiwa Waziri wa Mambo ya Nchi za Nje wa Tanzania wakati wa utawala wa Mwalimu Nyerere,” alisema Mnajimu Maalim Hassan Yahya Hussein aliyehojiwa na gazeti hili.

Aliongeza kuwa shughuli za Freemasons nyingi huwa ni za kijamii na zinafahamika na karibu viongozi wote wa kitaifa waliopo madarakani na hata wale ambao waliongoza nchi.
“Kama kuna siri, basi Mkapa atakuwa anajua maana amekuwa karibu na Sir Andy Chande kwa muda mrefu, tangu enzi za Mwalimu Nyerere” alisema.

Katika mtandao huo, kiongozi wa pili ambaye anaonekana kuhudhuria hafla za jamii hiyo ni rais wa awamu ya pili, Mzee Ally Hassani Mwinyi akifuatiwa na Rais Jakaya Kikwete na hata aliyekuwa Waziri Mkuu, Frederick Sumaye.

MWALIMU NYERERE
Mwalimu Julius Nyerere naye ana picha mbalimbali mtandaoni humo akiwa na Sir Andy Chande na alikuwa akifuatana na Mkapa katika shughuli za kiserikali kwani imeelezwa kuwa kigogo huyo wa Freemasons alikuwa akiaminiwa sana na baba wa taifa kiasi cha kumfanya kuwa mwenyekiti wa bodi mbalimbali za mashirika ya umma aliyoyaongoza vyema.

Miongoni mwa bodi alizozisimamia kwa umakini mkubwa ni Shirika la Reli Tanzania (TRC) na Shirika la Usagaji la Taifa (NMC), mashirika ambayo baada ya uongozi wake yalizorota na hatimaye kufa. Sir Andy Chande pia amewahi kuwa Mwenyekiti wa Bodi wa Mamlaka ya Bandari Tanzania.

Gazeti hili hivi karibuni lilimtafuta Sir Andy Chande kwa njia ya simu ili kuhojiana naye lakini mmoja wa wasaidizi wake, Ramji Suryakanti alisema kiongozi huyo amekwenda nchini India kwa ajili ya kupata matibabu.

track mpya ya dogo janja ft pnc.

I'm listening to Dogo Janja ft Pnc -Ya Moyoni.mp3 in Hulkshare:

Annan kujiuzulu wadhfa wake Syria

Mjumbe wa amani wa kimataifa nchini Syria, Kofi Annan, amesema kuwa mwenendo wa kutotaka kupatana kutoka kwa utawala wa rais Bashar al Assad ndiyo sababu kubwa ya hatua yake ya kujiuzulu ifikapo mwishoni mwa mwezi huu.

Bwana Annan amesema kuwa harakati za kijeshi kutoka kwa wapiganaji wa upinzani pia zimechangia katika kufanya majukumu yake kuwa magumu na pia mgawanyiko uliokuwepo katika baraza la usalama la umoja wa mataifa.

Kofi Annan

Miezi mitano iliyopita Kofi Annan alikabidhiwa jukumu Kubwa la kupatanisha utawala wa Rais wa Syria Bashar Al Assad na waasi wa upinzani wenye nia ya kumng'oa madarakani.

Lakini leo inaelekea maji yamezidi unga na Bw Annan ametangaza nia yake kujihuzulu.
Amesema hatua hiyo imechochewa na ukosefu wa Ushirikiano kutoka kwa Rais Assad na pia makundi ya waasi. Mpango wa kusitisha mashambulio uliopendekezwa na Bw Annan umekuwa ukipuuzwa na pande zote.
Serikali kwa upande wake imeendeleza mashambulio na kusababisha mauaji ya raia huku wapinzani nao wakiimarisha vita dhidi ya serikali.
Vilevile Bw Annan ameshtumu jamii ya kimatifa kwa kutounga mkono kikamilifu juhudi zake. Amesema huku umwagikaji damu ukiendelea nchini Syria jamii ya kimataifa imegawanyika kuhusu jinsi ya kutatua mzozo huo.
Rais Assad hajawahi kukubali upunzani kufanya maandamano ya kupinga utawala wake na badala yake amekuwa akitumia nguvu.
Amekuwa akiungwa mkono na Uchina na Urusi na hata kupewa msaada wa silaha.

Waasi katika mji wa Aleppo nchini Syria

Katika miezi ya hivi karibuni juhudi za Kofi Annan kutafutia mgogoro huo suluhu pia zimekuwa zikisambaratishwa na mgawanyiko kati ya baadhi nchi wanachama wa Umoja wa Mataifa.

Marekani,Uingereza na Ufaransa zimetofautiana vikali na Uchina na Urusi kuhusu mwelekeo unaofaa kumaliza mapigano nchini Syria.

Baada ya Kofi Annan kujihuzulu mwishoni mwa mwezi huu,haijulikani Umoja wa mataifa utakuwa na jukumu gani katika mpango wa kutafuta amani nchini Syria.

Balozi wa Marekani katika umoja wa mataifa Susan Rice amesema juhudi za Annan hazingeweza kufaulu kutokana na utawala wa Rais Assad kupuuza mapendekezo ya kumaliza mapigano.

Naye Rais wa Urusi Vladmir Putin amesema amejuta kujihuzu kwa Kofi Annan ambaye amemtaja kama mwanadiplomasia shupavu.

Serikali ya Syria inaendelea kutumia nguvu.
Hali katika mji mkuu Damascus ni ya kusikitisha na mjini Allepo makabiliano makali yanaendelea.
Mwelekeo wa Syria sasa umegeuka na kuwa vita badala ya amani.

HALI YA DIAMOND BADO NI TATA.

MWANAMUZIKI aliye juu kuliko wote kwa sasa kwenye Bongo Fleva, Nasibu Abdul Juma ‘Diamond Platinumz’ yamemkuta baada ya kuugua ghafla na kulazwa huku hali yake ikielezwa kuwa siyo nzuri ikiwa ni siku chache tangu amchane baba’ke Abdul Juma, Ijumaa linafunguka ripoti kamili.
AKIMBIZWA HOSPITALINI
Kwa mujibu wa chanzo makini ambacho ni ndugu wa karibu wa staa huyo, Jumanne ya Julai 31, mwaka huu, Diamond alikimbizwa Hospitali ya Heameda Medical Clinic iliyopo Upanga jijini Dar akisumbuliwa na ugonjwa uliomshambulia sehemu ya kifua.
CHANZO CHATIRIRIKA
“Naongea na Ijumaa? Kwa taarifa yenu dogo (Diamond) hali yake si nzuri leo (Jumanne wiki hii) na hivi ninavyowaambia tuko hospitali anafanyiwa uchunguzi,” alisema ndugu huyo wa Diamond kisha akakata simu ndipo waandishi wetu wakaingia mzigoni na kunyaka mchongo kamili.
Baada ya chanzo kuingia mitini, Ijumaa lilianza kumfuatilia Diamond hadi likampata na kuzungumza naye akiwa hoi.
Kwanza ‘kichaa’ huyo wa muziki alikiri kuumwa ghafla na kukimbizwa hospitali kisha akaendelea kudadavua kilichomsibu.
TUMSIKIE DIAMOND
“Diamond hatunaye tena....hiyo ndiyo ingekuwa kichwa cha habari kwenye ‘midia’ na watu wengi kwenye social networks (mitandao ya kijamii) na simu zao.
“Kiukweli hali yangu ilikuwa ni mbaya sana, nilizidiwa na homa kali ya ghafla iliyosababishwa na kifua kilichonisumbua kwa takribani wiki mbili mfululizo.
“Namshukuru Mungu baada ya vipimo vyote iligundulika ni kifua cha kawaida tu ila kilisababishwa na tour (ziara) nyingi nilizozifanya mfululizo bila mapumziko.
LAKINI ANAENDELEAJE?
“Kwa sasa hali yangu si mbaya sana...nawashukuru wote waliokuwa wakiniombea,” alifunguka Diamond.
HOFU YATANDA
Diamond aliendelea kufunguka kuwa hofu ilitanda kuhusu hatima yake ndiyo maana akawaambia madaktari wampime kila kitu ikiwemo Virusi Vya Ukimwi (VVU).
“Nilichanganyikiwa kwani sikuelewa ni nini hasa kilichonitokea hadi mawazo yangu yakaenda mbali na kuwaza labda nimeukwaa ndipo nilipowaambia madaktari cha kwanza kunipima ni huu ugonjwa wa kisasa,” Alisema Diamond.
WEMA NAYE GONJWAGONJWA
Katika hali ya kushangaza, Ijumaa lilipozungumza na mpenzi wa Diamond kwa sasa, Wema Isaac Sepetu, naye alikiri kuwa mgonjwamgonjwa (hakutaja ugonjwa ndiyo maana alishindwa kwenda hospitalini kumhudumia ‘hubby’ wake huyo.

SERIKALI ILIFIKIRIE MARA MBILI MWANAHALISI

SERIKALI ya Jamhuri ya Muungano kupitia msajili wa magazeti ambayo ni Idara ya Habari (Maelezo), imelifungia Gazeti la Mwanahalisi kwa muda usiojulikana.
 
Uamuzi huo, ulitolewa Jumatatu ya wiki hii na Kaimu Mkurugenzi wa Maelezo, Phabian Lugaikamu, akibainisha kwamba serikali kupitia Wizara ya Habari, Vijana, Utamaduni na Michezo, inalifungia Mwanahalisi kutokana na mwenendo wake wa kuandika habari na makala za uchozezi.

Lugaikamu alifafanua kwamba Mwanahalisi limekuwa likijenga uhasama na uzushi, likiwa na nia ya kusababisha wananchi wakose imani na vyombo vya dola, hali inayoweza kuhatarisha amani na mshikamano wa nchi.

Akafafanua pia kwamba gazeti hilo namba 302, 303 na 304 ya mwaka 2012 na mengine yaliyotangulia yalichapisha habari na makala zenye kueneza na kujenga hofu kwa jamii.

Pamoja na ufafanuzi mzuri wa serikali na hoja zake za kulifungia gazeti hilo, sisi Global Publishers (wachapishaji wa magazeti pendwa nchini, Uwazi, Ijumaa, Amani, Risasi, Ijumaa Wikienda na Championi), tunashauri uamuzi huo ufikiriwe mara mbili.

Ni ukweli kwamba serikali imetumia haki na mamlaka yake kutokana na meno iliyopewa kupitia sheria ya magazeti nchini ya mwaka 1976, kifungu nambari 25 (i), lakini ni rai yetu kuangalia pia athari za upande wa pili baada ya kulifungia gazeti hilo.
 
ATHARI NAMBARI MOJA
Athari ya kwanza ambayo sisi Global tunaiangalia ni kutetereka kwa ajira za wafanyakazi wa Kampuni ya Hali Halisi Publication, inayochapisha gazeti hilo. Mwanahalisi kama uti wa mgongo wa kampuni hiyo, kusimamishwa kwake kunahatarisha ajira za wafanyakazi wake.

Uhai wa kampuni unategemea uzalishaji, sasa kampuni kama haizalishi, ni wazi haitaweza kulipa mishahara wafanyakazi wake. Tunaomba serikali itupie jicho eneo hili.
 
ATHARI NAMBARI MBILI
Sisi Global, tunatambua na kuheshimu Katiba ya Jamhuri ya Muungano wa Tanzania, hivyo basi tunaelewa uwepo wa kifungu namba 30, kinachofafanua juu ya kikomo cha uhuru wa kutoa maoni.

Hata hivyo, ndani ya katiba hiyohiyo, Ibara ya 18, inatoa uhuru wa mtu kutoa maoni. Vema serikali ikarejea Ibara ya 18 kisha kupima mara ya pili na kujiridhisha kuhusu uamuzi wake wa kulifungia gazeti hilo.
 
HITIMISHO LETU
Sisi Global, tunaiheshimu serikali na uamuzi wake iliyochukua dhidi ya gazeti hilo. Hata hivyo, kupitia athari ya kutetereka kwa ajira na kipengele cha kuonekana inaingilia uhuru wa habari na utoaji maoni, tunaishauri kufikiria mara mbili na ikiwezekana, ilisamehe Mwanahalisi liendelee kufanya kazi yake.

SKENDO YA RUSHWA KWA WABUNGE, HAPONI MTU

 HALI bado tete ndani ya Bunge la Jamhuri ya Muungano wa Tanzania linaloendelea mjini Dodoma kufuatia madai ya kuwepo kwa wabunge waliokula mlungula ili kuitetea ajira ya Bosi Mkuu wa Shirika la Ugavi Tanzania (Tanesco), William Mhando ambaye amesimamishwa kazi kupisha uchunguzi wa madai ya matumizi mabaya ya madaraka, Ijumaa limechimba.
 
Habari za chini ya kapeti zinasema kuwa baadhi ya wabunge na viongozi wa vyama vya siasa wanapiga ‘ndogondogo’ ili waheshimiwa wanaotuhumiwa kupokea ‘kitu kidogo’ wabatilishiwe ubunge wao na serikali iitishe chaguzi ndogo ili kuziba nafasi zao.

“Unajua tatizo kubwa ni kwamba wapo baadhi ya wabunge wanaojiona wasafi na wapo viongozi wa siasa wanataka wabunge wenye kashfa watimuliwe na kwenye majimbo yao kuitishwe chaguzi ndogo.

“Hawa viongozi wa siasa (baadhi) ni wale ambao wabunge wao waliotuhumiwa ni tishio kwa maslahi yao ndiyo maana wanataka wang’oke, lakini uchunguzi umeanza, sijui kama kuna atakayepona,” alisema mbunge mmoja wa kutoka mkoa wa Arusha.

Awali majina ya wabunge hao yalikuwa siri, lakini juzikati, Mnadhimu Mkuu wa Kambi ya Upinzani Bungeni, Tundu Lissu (Chadema-Singida Mashariki) aliwafungukia waheshimiwa hao kwa majina.

Lissu aliwataja Christopher ole Sendeka, Sarah Msafiri, Yusuf Nassir, Charles Mwaijage, Mariam Kisangi, Vicky Kamata na Munde Tambwe ambao wote walikuwa kwenye Kamati ya Nishati na Madini iliyovunjiliwa mbali na Spika wa Bunge, Mh. Anna Semamba Makinda.

Hata hivyo, kamati hiyo pia ilikuwa ikiundwa na Selemani Zedi (Mwenyekiti), Diana Chilolo (Makamu Mw/kiti), Haji Khamis, Catherine Magige, Abia Nyabakari, Dr. Festus Limbu, Athuman Mfutakamba na Lucy Mayenga.

Wengine ni Josephine Changula, Mwanamrisho Taratibu, Suleiman Nchambi, Ally Mbarouk Salim, Kisyeri Chambiri na John Mnyika.

Tayari Kamati ya Maadili, Haki, Kinga na Madaraka ya Bunge imeanza kufanya uchunguzi kama madai hayo yana ukweli wowote. Ikithibitika, ina maana hakuna atakayepona.