MAGAZETI YA LEO IJUMAA TAREHE 23/11/2012

MAJAMBAZI YAUWAWA KABLA YA KIFIKISHWA HOSPITALINI.

 Kamanda wa polisi Mkoa wa Arusha kamishna Msaidizi wa Polisi Liberatus Sabas akionyesha sare za Jeshi la Wananchi wa Tanzania (JWTZ0 ambazo zilikutwa  kwenye begi la watu watano ambao wanasadikiwa kuwa ni majambazi .Tukio hilo lililtokea katika eneo la Olmatejoo jijini Arusha leo asubuhi na Jeshi la Polisi lilifanikiwa kuwajeruhi kwa risasi Watatu kati yao ambao baadae walifariki dunia wakiwa wanapelekwa hospitali

 Kamanda wa Polisi Mkoa wa Arusha kamishna Msaidizi wa Polisi Liberatus Sabas akionyesha bunduki zilizokutwa kwenye begi la watu watano wanaosadikiwa kuwa ni majambazi ambapo watatu kati yao walijeruhiwa kwa risasi na askari wa jeshi la Polisi na kisha kufariki dunia wakiwa wanapelekwa hospitali leo asubuhi

Kamanda wa Polisi Mkoa wa Arusha Kamishna Msaidizi wa Polisi Liberatus Sabas akionyesha kitako cha bunduki aina ya Rifle iliyokutwa kwenye begi la watu watano wanaosadikiwa kuwa ni majambazi. Watatu kati yao walijeruhiwa kwa risasi na askari wa jeshi la polisi na kisha kufariki dunia leo asubuhi (Picha na Mahmoud AhmadArusha

 

Chanzo na Mjengwa

Mbeki Alia Mabilioni Yaliyofichwa Nje

RAIS Mtaafu wa Afrika Kusini, Thabo Mbeki amesema Bara la Afrika linapaswa kudhibiti utoroshaji wa rasilimali zake kwenda nje ya bara hilo, kwani ni moja ya sababu za maisha ya watu wake kuendelea kuwa duni.

Rais Mbeki alisema jana jijini Dar es Salaam kuwa taarifa mbalimbali zinaonyesha kuwa rasilimali zenye thamani zaidi ya Dola za Kimarekani Bilioni 50 hutoroshwa kila mwaka kutoka nchi za Afrika na kwenda kuwanufaisha watu wengine nje ya bara hilo.

“Taarifa zinaonyesha kuwa rasilimali zenye thamani zaidi ya Dola za Kimarekani Bilioni 50 hutoroshwa kila mwaka kwenda nje ya Afrika, lakini kwa mtizamo wangu mimi ni kwamba thamani halisi inaweza kuwa hata mara mbili (Dola za Kimarekani Bilioni 100) kwa mwaka,”alisema Mbeki.

Mbeki alikuwa akizungumza kwenye mjadala kuhusu “uongozi wenye malengo kwa ajili ya mabadiliko ya Afrika” ulioandaliwa kwa pamoja baina ya taasisi ya Uongozi (Uongozi Institute) ya hapa nchini na Mbeki Faoundation ya Afirka Kusini.

Kiongozi huyo alisema utoroshaji wa rasilimali hizo ni matokeo ya udhahifu katika usimamizi wake, na kwamba lazima Serikali za Afrika zichukue hatua kudhibiti utoroshaji huo.

Kauli ya Mbeki imekuja wakati Tanzania ikiwa katika mjadala mkali kuhusu taarifa kwamba baadhi ya vigogo wameficha mabilioni ya fedha nchini Uswisi, hivyo kuwapo shinikizo la kutaka wahusika watajwe na fedha hizo zirejeshwe nchini.

Taarifa hizo ziliibuliwa na mapema mwaka huu na baadhi ya vyombo vya habari likiwamo Gazeti hili na baadaye ilibainika kwamba fedha hizo ni mali ya Watanzania 27 wakiwemo wanasiasa na wafanyabiashara. Gazeti hili pia lilibaini kwamba mmoja wa walioficha fedha hizo anamiliki Dola za Marekani milioni 56 (sawa na Sh89.6 bilioni).

Katika uchunguzi wake, Mwananchi imebaini pia kuwa kiasi cha fedha kilichothibitishwa kumilikiwa na Watanzania hao ni jumla ya Dola za Marekani 186 milioni (Karibu Sh300 bilioni) kwa viwango vya sasa vya kubadilishia fedha ambavyo ni Sh1600 kwa Dola ya Marekani.

Taarifa hizo zinaeleza kuwa mbali na kigogo anayemiliki Sh90 bilioni, wapo wengine wanne, ambapo anayefuatia anamiliki Dola 30 milioni (Sh48 bilioni), mwingine Dola 20 milioni (Sh32 bilioni) na wengine wawili kila mmoja anamiliki Dola 10 milioni (Sh16 bilioni).

Chanzo: http://www.mwananchi.co.tz/habari/Kitaifa

Maranda ahukumiwa tena jela

Farijala Hussein (kushoto) na Rajabu Maranda wakisindikizwa na Askari Magereza kwenda kupanda gari kurejeshwa gerezani baada ya Mahakama ya Hakimu Mkazi Kisutu ya jijini Dar es Salaam, jana, kuwakuta na hatia ya kesi nyingine ya wizi wa fedha za Akaunti ya Madeni ya Nje (EPA) iliyokuwa ikiwakabili. Picha na VenanceNestory  

KWA mara ya tatu, Kada wa Chama Cha Mapinduzi (CCM), Rajabu Maranda amehukumiwa kifungo cha miaka miwili jela na kuamriwa kurejesha Sh616.4 milioni.

Binamu yake, Farijala Hussein ambaye walishtakiwa pamoja alihukumiwa kifungo cha miaka mitatu jela na kuamriwa kurejesha Sh81 milioni na mfanyabiashara Ajay Soman akihukumiwa kifungo cha miaka miwili jela, sawa na Maranda lakini yeye akiamriwa arejeshe Sh400 milioni.

Washtakiwa wengine ambao ni wafanyakazi wa Benki Kuu ya Tanzania (BoT), Iman Mwakosya, Ester Komu na Sophia Kalika walitiwa hatiani kwa kosa la kuisababishia Serikali hasara na kuhukumiwa kifungo cha miaka mitatu jela ama kulipa fidia ya Sh5 milioni.

Kabla ya kusoma hukumu hiyo iliyochukua zaidi ya saa 4,  Hakimu Mfawidhi wa Mahakama ya Kisutu, Ilvin Mugeta alisema washtakiwa wote wamepatikana na hatia  katika makosa ya kughushi, kujipatia fedha kwa njia ya udanganyifu, kuwasilisha nyaraka za uongo BoT na kuisababishia Serikali hasara ya Sh3.8 bilioni.

Hakimu Mugeta alisema wafanyakazi wa BoT hawatahusika katika mpango wa kurejesha fedha kwa sababu ushahidi unaonyesha hawakunufaika na chochote katika wizi huo.

Alisema Maranda, Farijala na Soman hawa kuna ushahidi ambao unaonyesha kuwa walijinufaisha na fedha hizo hivyo wanatakiwa kuzirejesha na kwamba iwapo watashindwa kutekeleza amri hiyo, mali zao zikamatwe.

Wakili wa Serikali, Shedrack Kimaro awali, aliiambia mahakama kuwa Maranda na Farijala walikwisha tiwa hatiani kwa makosa ya aina hiyo  katika kesi namba 1161/2008 na 1163/2008 na kwamba hawana kumbukumbu ya kutenda  makosa ya uhalifu kwa washtakiwa Ajay, Iman, Ester na Sophia.

Kimaro alisema kutona na aina ya makosa  na fedha za umma aliomba mahakama itoe adhabu kali ili iwe fundisho  kwa waharifu wengine  wenye tabia kama hiyo.

Pia aliiomba mahakama itumie mamlaka yao yaliyopo katika kifungu cha 348 (1) ama cha 358 (1) cha sharia ya mwenendo wa mashauri ya jinai sura ya 20, kuwaamuru washtakiwa hao kurejesha fedha wanazodaiwa kuiba BoT, kama walivyojipatia.

Magafu akijibu hoja hizo, alidai kuwa Maranda na Farijala wasipewe adhabu kali kwa sababu kesi hizo zilifunguliwa wakati mmoja na kwamba tofauti ilikuwa ni majina ya kampuni na kuwa aliyestahili kupewa onyo kama hilo ni yule aliyefanya uhalifu na akarudia tena.

Maranda na binamu yake Farijala  Hussein tayari wanatumikia kifungo cha miaka mitano jela baada ya kupatikana na hatia ya wizi wa Sh 1.8 bilioni za Akaunti ya Madeni ya Nje ( Epa) iliyopo BoT na kuamuriwa kurejesha kiasi hicho cha fedha.

Licha ya kutumikia kifungo hicho, pia wanatumikia kifungo kingine cha miaka mitatu jela baada ya kupatikana  na hatia katika kesi ya tuhuma za kuchota Sh 2.2 bilioni  za EPA.

Hukumu hiyo ya tuhuma za wizi wa Sh3.8 bilioni za Epa, ilisomwa na  jopo la Mahakimu watatu linaloongozwa na Jaji Samuel Kalua, Jaji Beatrice Mutungi na Hakimu Mfawidhi wa Mahakama ya Kisutu, Ilvin Mugeta.

Katika kesi hiyo, washtakiwa hao, kwa pamoja  wanadaiwa kuwa,  kati ya Januari 18 na Novemba 3, 2005, kinyume na kifungu namba 384 cha kanuni ya adhabu sura ya 16 ya sheria, walikula njama ya wizi wa fedha kutoka BoT.

Pia wanadaiwa kughushi hati ya usajili yenye namba 46218 na kuonyesha kuwa zimesainiwa na kutolewa na Msajili wa Biashara kwa Kampuni ya Mibale Farm wakati si kweli.

Wanaendelea kudaiwa kujipatia Sh3.8 bilioni baada ya kudanganya kuwa kampuni yao ya Mibale Farm imepewa deni na kampuni ya Textile Mills Ltd ya nchini India.

Chanzo na mwananchi habari

Mawaziri wazomewa mbele ya Kinana

KATIBU Mkuu wa CCM, Abdulrahman Kinana 

MAWAZIRI watatu wa Rais Jakaya Kikwete juzi walizomewa baada ya kupanda jukwaani kujibu kero mbalimbali za wananchi katika mkutano wa kwanza wa viongozi wapya wa CCM taifa, ulioongozwa na Katibu Mkuu wake, Abdulrahaman Kinana.

Tukio hilo lilitokea juzi mkoani Mtwara ambako Kinana na mawaziri hao walikuwa katika ziara ya chama kujibu kero mbalimbali za wananchi.Mawaziri waliokumbwa na dhahama hiyo ni Christopher Chiza wa Kilimo, Chakula na Ushirika, Hawa Ghasia (Tawala za Mikoa na Serikali za Mitaa - Tamisemi) Naibu wake, Aggrey Mwanri.

Chiza ndio alikuwa wa kwanza kukumbana na zomeazomea hiyo, lakini mambo yalikuwa magumu zaidi kwa Ghasia ambaye alizomewa tangu alipoanza kuzungumza mpaka alipomaliza.Ghasia ambaye pia ni mbunge wa Mtwara Vijijini, alirushiwa makombora na Rukia Ismail Athumani ambaye alimshutumu yeye pamoja na Mbunge wa Mtwara mjini, Asnein Murji kwamba waliruhusu gesi kupelekwa Dar es Salaam wakati wananchi wa mkoa huo hawajafaidika nayo.

“Ghasia na Murji kwanini mnaudanganya umma kwa kupeleka gesi Dar es Salaam, sisi hatuna ubaya na chama ila hatutaki gesi iende huko” alisema Athumani huku akishangiliwa na mamia ya watu waliohudhuria mkutano huo.Kabla ya dada huyo kuteka hisia za wananchi kwa kuwasilisha kero hiyo, Kinana alimruhusu mwananchi mwingine, Issa Kambona ambaye pia alieleza kuwa hakubaliani na suala la gesi hiyo kupelekwa Dar es Salaam.

Kinana alisema amesikia hoja hizo za wananchi na kwamba atamueleza Waziri wa Nishati na Madini azungumze na wananchi wa Mtwara kuhusu gesi hiyo.Baada ya mambo kuzidi kuwa magumu, Ghasia alilazimika kupanda jukwaani kujibu makombora aliyokuwa akirushiwa na wananchi waliofika katika mkutano huo.

“Sio kweli kwamba hatutetei maslahi yenu, gesi iliyopo ni nyingi hamuwezi kuitumia na kuimaliza, kuna futi za ujazo trilioni 20,000 na tunaweza kuitumia kwa zaidi ya miaka 90, hata hivyo, Wizara ya Nishati na Madini imetoa ofa ya kuwalipia chuo vijana 150 kila mwaka,” alisema Ghasia, lakini wananchi hao waliendelea kumzomea.“Uongo, uongo, hatutaki, hatutaki, huyoo, huyooo” walisikika wakisema wananchi hao, hali iliyomfanya Katibu wa Itikadi na Uenezi wa chama hicho, Nape Nnauye kuingilia kati, kujaribu kuwatuliza.

“Kelele unazozisikia dada (Ghasia) zinaashiria kuna jambo, nafasi hizo 150 hawazipati, kama zinatolewa basi kwa upendeleo,” alisema Nape huku akishangiliwa na wananchi hao.Baada ya hali kutulia kiasi, Ghasia alijaribu kuendelea kutoa ufafanuzi, lakini kitendo cha kuanza kuzungumza, wananchi hao walianza tena kuzomea.

“Kila mtu amelelewa katika mazingira tofauti, hilo halinihusu…watu wangu wa Mtwara vijijini wamenielewa,” alisema Ghasia na kuteremka jukwaani hali iliyozidisha kelele za kumzomea.Nape alisawazisha mambo kwa kusema, hoja ya wananchi hao imechukuliwa na itawasilishwa kwa Serikali ili kuona namna ambavyo inaweza kukaa na wananchi hao na kuweka maslahi yao mbele.

Ilivyoanza
Panzia la zomea zomea lilifunguliwa na Chiza alipopanda jukwaani kujibu hoja ya kuyumba kwa soko la zao la korosho, ambapo wananchi walimpinga baadhi ya kauli alizozitoa.“Tatizo la korosho ni baadhi ya viongozi wa vyama vya ushirika na wengine ni watendaji wa Serikali …nipo hapa na wala siondoki, nitalishughulikia hili ili korosho zinunuliwe” alisema Chiza huku sauti za wananchi zikimpinga kwa kusema “uongooo”.

Hata hivyo, Chiza aliweza kukabiliana na hali ya zomeazomea jukwaani baada ya watuliza wananchi kwa kusisitiza kuwa ataendelea kuwapo Mtwara, kushughulikia tatizo hilo ili ununuzi uendelee.Naibu Waziri wa Tamisemi, Mwanri alipata wakati mgumu mara alipopanda jukwaani na kuanza kuzungumzia namna ya kumaliza kero ndogondogo zinazoletwa na mamlaka zake, wananchi walikuwa wanazoea “huyoo…hatutaki” lakini baada ya kuanza kuongea alionekana kuiteka hadhira na mambo yakawa shwari. “

“Tumesema wauza vitumbua, wasibughudhiwe … mkurugenzi njoo jukwani, nakuagiza kuanzia leo marufuku wanafunzi kurudishwa shuleni kwa sababu ya michango” alisema Mwanri huku akishangiliwa.Awali Kinana alisema mkutano huo unalenga kuzipatia ufumbuzi kero za wananchi ambazo zinawezakuwa kikwazo kwa chama hicho kuingia madarakani mwaka 2015.

Katibu mkuu huyo wa chama tawala alisema umefika wakati wa chama kusimamia utendaji wa Serikali kutatua kero za wananchi wa mkoa wa Mtwara ikiwa ni pamoja na kuyumba kwa soko la korosho na gesi.“Najua hapa kuna kero kubwa mbili, korosho na gesi, nimekuja na Mawaziri hapa watatoa majibu leo” alisema Kinana huku akishangiliwa na umati mkubwa wa watu ulioudhuria mkutano huo.

Sifa mgombea urais
Katika hatua nyingine, Kinana amevunja ukimya kuhusu mbio za urais mwaka 2015 na kusema CCM itamtosa bila kumuonea haya mwanachama yeyote atakayeomba kuteuuliwa kugombea urais kwa tiketi yake, huku akiwa kinara wa kutegemea makundi kumwigiza katika nafasi hiyo.Badala yake akaeleza kuwa chama hicho kitamteua mgombea mwadilifu, anayekubalika na watu na asiye na makundi.

Mbali na sifa hizo Kinana pia ameeleza kuwa mgombea huyo wa CCM atakuwa msafi, makini, mchapakazi, mzalendo ambaye anajali maslahi ya wananchi na kwamba Mei 2015 wataanza kutoa fomu kwa wana CCM wanaowania nafasi hiyo.Kinana alisema hayo jana katika kijiji cha Isesa, Sumbawanga Mjini wakati akifungua tawi la CCM na kuzungumza na wanachama.

Katika kipindi cha kuuliza maswali, wanachama hao walitaka kufahamu namna chama hicho kilichojipanga kumpata mgombea urais makini ambaye hatakuwa mzigo kumnadi dhidi ya wapinzani.“Tumejipanga vizuri, atapatikana mgombea urais bora, vigezo vipo wazi tunataka mgombea urais mwadilifu, makini, mchapakazi, mzalendo ambaye anakubalika na wananchi,”alisema Kinana.

Aliongeza kwamba chama hicho kitatoa fomu kwa wanaotaka kuwania nafasi hiyo na vikao vya chama ndivyo vitakavyoamua,”alisema Kinana.“Tuna utaratibu mzuri wa kupata wagombea urais bora kwa sababu vigezo vyote viko wazi na kwamba wagombea hao watapimwa kwa vigezo hivyo,” alisema Kinana.

Alisema Wanasumbawanga wasiwe na wasiwasi watampata mgombea ambaye atakuwa mwiba kwa vyama vya upinzani.Alisema kiongozi mwenye makundi na asiyekuwa mwadilifu hatakuwa na nafasi ya kuteuliwa na chama hicho kugombea urais.“Haya si maneno yangu bali ni vigezo vya chama vilivyo wazi ambavyo vinatumiwa kwa kila mgombea wa nafasi hiyo kubwa kushinda zote,” alisema

Alisema anakifahamu chama hicho na kwamba kitavitumia vigezo hivyo ili kupata mgombea urais ambaye wananchi wanamkubali.Awali wanachama wa chama hicho wakiongea kwa hisia kali, walisema wanataka chama hicho kimsimamishe mgombea urais atakayekuwa mwiba kwa wapinzani.

“Tunayasikia majina ya watu wanaowania nafasi hizo, chonde chonde katibu mkuu tunaomba apatikane kiongozi ambaye hatatupatia kazi ya kumnadi, awe mwadilifu ambaye akitangazwa watu wafurahi bila kunung’unika,” alisema Peter Lilata.Alisema, “tukikosea kuteua kiongozi bora tutakuja kujuta hapo baadaye.”

Vijana CCM, Chadema nusura wazipige
Katika ufunguzi wa tawi la CCM la Isesa nusura vijana CCM na wa Chadema watwangane makonde baada ya vijana wa Chadema kuwatuhumu CCM kwamba wamewaibia bendera ya chama chao.

Mabishano kuhusu bendera hiyo yaliendelea katika kipindi chote ambacho Kinana alikuwa akizungumza na wanachama wa tawi hilo.“Hawa CCM wameng’oa bendera yetu hapa huo siyo ustaraabu ni lazima mturudishie bendera yetu vinginevyo patakuwa hapatoshi,” mmoja wa vijana wa Chadema alisikika akisema.

Hata hivyo, busara za askari polisi waliokuwa katika mkutano huo zilisaidia kuzima hasira za vijana wa Chadema.

Chanzo na mwananchi habari

Mfanyabiashara mwanamke auawa kinyama

MFANYABIASHARA maarufu mjini hapa, mwanamke mwenye asili ya Kiasia, Previna Chade (60) amekutwa ameuawa nyumbani kwake na watu wasiofahamika.

Kamanda wa Polisi Mkoa wa Mwanza, Ernest Magu alisema tukio hilo lilitokea Novemba 17, mwaka huu majira yasiyofahamika.

Mangu alisema siku ya pili baada ya kufanyika kwa tukio hilo, majira ya mchana, majirani wa marehemu walipata wasiwasi na kutoa taarifa polisi.

Alisema baada polisi kupata taarifa walikwenda hadi nyumbani kwa marehemu na kubomoa mlango, ndipo walipokuta amefariki dunia baada ya kupingwa na kitu kizito kichwani.

Alisema katika tukio hilo, polisi inawashikilia watu watatu kwa uchunguzi zaidi na mwili wa marehemu upo Hospitali ya Rufani Bugondo.

Wakati huohuo, watu watatu wamefariki dunia huku 24 wakijeruhiwa baada ya basi linalofanya safari zake kutoka Mwanza kwenda Magu kupata ajali baada ya kuacha njia na kupinduka.

Kamanda Mangu alisema ajali hiyo ilitokea saa 12:00 asubuhi katika Kijiji cha Isangijo, wilayani Magu kutokana na mwendokasi.

Alisema kutokana na mwendokasi, dereva alishindwa kudhibiti gari hilo, hali iliyosababisha kupoteza mwelekeo kwa kuacha njia na kuingia porini kisha kupinduka.

Alisema baada ya kusababisha ajali hiyo, dereva alikimbia na hajafahamika alipo kwa sasa na kwamba polisi inamsaka ili afikishwe mahakamani.

Kamanda Mangu alisema miili ya marehemu imehifadhiwa katika Hospitali ya Rufani Bugando, huku baadhi ya majeruhi wakiendelea kupata matibabu.

chanzo na mwananchi habari

NDEVU ZA VIONGOZI WA KUNDI LA UAMSHO ZAZUA BALAA MAHAKAMANI.

Sheukh Farid Kabla ya kunyolewa ndevu.

VIONGOZI wa Jumuiya ya Uamsho, Sheikhe Faridi Hadi Ahmed na Mwenyekiti wa Jumuiya hiyo, Sheikh Mselem Ali Mselem, wamewasilisha maombi Mahakama Kuu ya Vuga Zanzibar, kutaka kufungua kesi kupinga kunyolewa ndevu wakiwa mahabusu.
Kutokana na ombi hilo, Mahakama Kuu ya Vuga mjini hapa, imekubali ombi hilo na kutoa uamuzi wa kuwaruhusu viongozi hao, wafungue kesi ya madai, kupinga kunyolewa ndevu zao na kutotendewa haki wakiwa mahabusu.
Sheikh Farid na wenzake, wanashtakiwa kwa makosa ya kuhatarisha usalama wa taifa.
Uamuzi wa kuwaruhusu viongozi hao wafungue kesi ya madai, umetolewa jana na Mrajisi wa Mahakama Kuu ya Zanzibar, George Kazi, baada ya kupitia kwa makini maombi ya watuhumiwa hao.
Washtakiwa hao waliwasilisha mambo hayo Novemba 8, mwaka huu, kupitia kwa mawakili wao, wakipinga kitendo cha polisi kuwanyoa ndevu na kutowatendea haki wakiwa mahabusu.
Maombi hayo yaliwasilishwa na washtakiwa wanane, akiwemo Sheikh Farid na Mwenyekiti wa Uamsho, Sheikh Mselem.
Wengine katika kesi hiyo ni Mussa Juma Issa, Suleiman Juma Suleiman, Azan Khalid Hamdan, Khamis Ali Suleiman, Hassan Bakar Suleiman na Ghalib Ahmada Omar.
Akitoa uwamuzi wa kufungua kesi ya kupinga kunyolewa ndevu, Jaji Kazi alisema watuhumiwa wana haki ya kufungua kesi mahakama kuu juu ya kile wanachokilalamikia na kwamba mahakama kuu itakuwa na uamuzi wa kuyasikiliza madai yao tofauti na kesi ya msingi ya uchochezi na kuhatarisha amani.
Kupitia kwa mawakili wao, watuhumiwa hao walidai kuwa wananyimwa uhuru na haki zao za msingi ikiwa ni pamoja na kupigwa marufuku kufuga ndevu wakiwa rumande ya Chuo cha Mafunzo (Magereza).

Katika kesi yao ya msingi, watuhumiwa hao wanakabiliwa na mashtaka manne yakiwemo ya kutoa lugha za uchochezi, kufanya vurugu na kusababisha uharibifu wa miundombinu ya barabara mjini Zanzibar.
Wakizungumzia kesi ya msingi kwa watuhumiwa hao, waendesha mashtaka wa serikali walidai kuwa upelelezi wa kesi hiyo haujakamili na kwamba wanaomba siku nyingine ya kutajwa.

Sheikh Farid baada ya kunyolewa ndevu.

Mrajis huyo wa Mahakama Kuu ya Zanzibar, ameahirisha kesi hiyo hadi Novemba 29, itakapotajwa tena.
Kama kawaida, Jeshi la Polisi lilifunga barabara zote za kuingia na kutoka mahakamani na kuimarisha ulinzi ndani na nje ya mahakama hiyo ambapo kila pembe walionekana makachero wa polisi na Askari wa Kikosi cha Kutuliza Ghasia (FFU), wenye silaha za moto.
Baadhi ya wananchi waliofika mahakamani hapo, waliwataka waandishi wa habari kuandika ukweli kuhusiana na kesi hiyo ili kuinusuru nchi na machafuko.

WAHITIMU WA CHUO CHA UDOM WASOTEA MAJOHO

 Baadhi ya wahitimu wa chuo kikuu cha Dodoma wakiwa kwenye foleni tayari kwa kuchukua majoho yao ambayo watayavaa katika sherehe za kumalizia safari yao ya miaka mitatu ya masomo yao ya Chuo Kikuu Cha Dodoma hapo Jana na leo

Foleni ikiwa haisogei kabisa huku wengine wakiendelea kusubiri na wengine kupiga stori mara baada ya kutokuonana takribani miezi minne tokea walipomaliza masomo yao chuoni hapo

Wahitimu wa Chuo Kikuu Cha Dodoma UDOM kitivo cha Sayansi ya Jamii, Sanaa na Lugha wakiwa kwenye foleni ya kuchukua majoho tayari kwa kuhudhuria sherehe za mahafali ya tatu ya chuo kikuu cha Dodoma yanayotarajia kufanyika tarehe 21 na 22 Novemba 2012 katika viwanja vya Chimwaga 

Hapo mwenye nguvu ndie alikuwa wa kwanza kuingia na mnyonge alisubiri yote hiyo wakigombania kuingia wa kwanza kwaajili ya kuchukua majoho tu

 Huku wengine wakiwa wamejikalia zao chini wakisubiri vurugu za kuingia kwaajili ya kuchukua majoho ziishe nao waingie kuchukua majoho yao

Baadhi ya wahitimu mara baada ya kuchukua majoho yao tayari kwaajili ya sherehe za mahafali ya tatu ya Chuo Kikuu cha Dodoma yanayotarajiwa kufanyika tarehe 21 na 22 novemba 2012 katika viwanja vya Chimwaga Chuoni hapo

 Mara Baada ya Kuchukua Majoho yao Wahitimu hawa waliyajaribu kwanza kuona yanawatosha huku wengine wakisema kuwa "safari hii Majoho Yanatolewa Kwa GPA likikuenea GPA yako ni kubwa lisipokuenea GPA Yako ni Ndogo"

MAPYA YAJITOKEZA KESI YA MWANDISHI WA HABARI

Karandika  lililobeba mahabusu wengine likiwasili mahakamani hapo bila ya mtuhumiwa wa mauwaji ya Daudi Mwangosi

Askari  polisi  wakiweka ulinzi kumziba mwenzao asipigwe picha leo

Mtuhumiwa wa mauwaji ya aliyekuwa mwandishi  wa habari wa Chanel Ten mkoa  wa Iringa Daudi Mwangosi , askari mwenzao mwenye  namba G2573 Pasificus Cleophace Simoni (23) akiingia katika gari la polisi lenye namba za usajili PT 1404  huku ulinzi ukiwa umeimarishwa  kuzuia wanahabari  wasipige picha

Wanahabari  wakiwa  wamejipanga kwa  picha wakisubiri mtuhumiwa  kuletwa mahakamani hapo 

SAKATA ya mauwaji ya aliyekuwa  mwandishi  wa habari  wa  kituo cha Chanel Ten mkoani Iringa  marehemu  Daudi Mwangosi limeendelea  kuchukua sura mpya mkoani Iringa  baada ya askari  polisi  anayetuhumiwa kuhusika na mauwaji hayo kufichwa katika gari maalum na askari  wenzao .

Tukio  hilo  lilitokea  leo wakati mtuhumiwa huyo akifikishwa mahakamani huku askari  polisi hao  muda  wote  walionekana kuzunguka huku na kule katika mahakama hiyo kama njia ya  kuwathibiti  wanahabari  waliokuwepo mahakamani hapo wasipate nafasi ya  kumpiga  picha mtuhumiwa  huyo ambaye ni  askari mwenzao mwenye  namba G2573 Pasificus Cleophace Simoni (23)

Hata  hivyo  kabla ya kuingia karandika la mahabusu wengine gari ya polisi aina ya Toyota yenye namba  za usajili PT 1404 ikiwa na askari  zaidi ya 10 ilifika katika  viwanja  hivyo  vya mahakama na  kuegeshwa pembeni  bila ya mtuhumiwa  huyo aliyekuwa amefunikwa sura  yake kwa kofia na kufichwa kabisa sura  yake kuonekana  huku  akiwa amekaa mbele kwa dereva  huku akifichwa na askari mwenzake pasipo kushuka.

Zikiwa  zimebaki kama dakika  10 mahakama kuanza  gari  hilo lilisogea hadi mlango wa Mahakama na askari  waliokuwepo mahakamani hapo  zaidi ya 20 kulizunguka gari  hilo huku  wengine  wakiwathibiti  wanahabari akiwemo mwandishi wa habari hizi   kama njia ya kuzuia kupigwa picha kwa mtuhumiwa huyo. Baada ya  kuingia ndani ya mahakama, kabla ya hakimu kufika uthibiti ndani ya chumba cha mahakama ulikuwa mkali zaidi dhidi ya  wanahabari hasa  wale wenye kamera.

Wakati  huo  huo Mahakama ya hakimu mkazi wa  wilaya ya Iringa imeahirisha  kesi  hiyo ya mauwaji ya mwanahabari Daudi Mwangosi ambae pia alikuwa ni mwenyekiti klabu ya  waandishi  wa habari mkoa  wa Iringa (IPC), mtuhumiwa huyo askari mwenye namba G2573  Simoni (23) atafikishwa tena mahakamani hapo Desemba 5 mwaka huu kesi hiyo  itakapo tajwa  tena. 

Mwendesha mashitaka  wa jamhuri  Adolf Maganda  aliieleza mnahakamani  hiyo  mbele ya hakimu   Dyness Lyimo  kuwa mtuhumiwa huyo mnamo 02 Septemba mwaka huu katika kijiji cha Nyololo Wilaya ya Mufindi Mkoa wa Iringa alimuua Daudi Mwangosi kwa makusudi kinyume na kifungu cha sheria namba 148 kifungu kidogo 5A.i cha makosa ya jinai.

Kwa mujibu wa kesi za jinai, sheria kifungu 196 kanuni ya adhabu Cap. 16 iliyofanyiwa marejeo mwaka 2002, kinakataza mtuhumiwa wa mauaji ya kukusudia kupewa dhamana.

DI MATTEO ATIMULIWA CHELSEA.

Di Matteo amebaki historia Chelsea

BILIONEA Mrusi Roman Abramovich amemfukuza kazi Kocha Mtaliano, Roberto Di Matteo asubuhi ya leo baada ya matokeo mabaya mfululizo.Kwa hisani ya Bin Zubeiry Blog

 

Mmiliki huyo wa Chelsea, amekasirishwa na matokeo mabaya ya timu hiyo katika Ligi ya Mabingwa Ulaya, na kumfukuza kazi Mtaliano huyo baada ya timu kuzabwa mabao 3-0 na Juventus jana, ikiwa ni miezi sita tu tangu aipe timu hiyo taji la Ligi ya Mabingwa Ulaya.

Sasa mtu wa kwanza kabisa ambaye Abramovich anamtaka akarithi mikoba ya Mtaliano huyo ni kocha wa zamani wa Barcelona, Pep Guardiola, na kama akikwama kwa Mspanyola huyo ambaye amesema hataki ukocha tena kwa sasa, basi atahamishia ndoana zake kwa Rafa Benitez.

MAKOCHA WALIODUMU MUDA MFUPI CHESLEA:

Guus Hiddink         Siku 105

Felipe Scolari         Siku 223

Avram Grand          Siku 247

Andre Villas-Boas   Siku 256

Roberto Di Matteo   Siku 262

MATOKEO YALIYOMFUKUZISHA KAZI DI MATTEO:

Oktoba 23: Shakhtar 2 Chelsea 1        (Ligi ya Mabingwa)

Oktoba 28: Chelsea 2 Man United 3    (Ligi Kuu)

Oktoba 31: Chelsea 5 Man United 4    (Kombe la Ligi)

Novemba 3: Swansea 1 Chelsea 1      (Ligi Kuu)

Novemba 7: Chelsea 3 Shakhtar 2      (Ligi ya Mabingwa)

Novemba 11: Chelsea 1 Liverpool 1     (Ligi Kuu)

Novemba 17: West Brom 2 Chelsea 1  (Ligi Kuu)

Novemba 20: Juventus 3 Chelsea 0     (Ligi ya Mabingwa)

MKATABA WA FELIX SUNZU WAISHA SIMBA F.C

 

 

Na Mahmoud Zubeiry

MSHAMBULIAJI wa kimataifa wa Zambia, Felix Mumba Sunzu Jr. anatarajiwa kumaliza mkataba wake mwezi ujao katika klabu ya Simba SC na hadi sasa mustakabali wake haueleweki kama ataongezewa mkataba au la. 

 

Kumekuwa na mawazo tofauti ndani ya Simba SC kuhusu Sunzu, ambaye kwa sasa ndiye mchezaji anayelipwa mshahara mkubwa zaidi Tanzania, Sh Milioni 5, kwamba hachezi kwa kiwango cha fedha anazolipwa.

 

Lakini wengine wanaamini Sunzu anawajibika vizuri na anastahili kwa fedha anayolipwa. Pamoja na hayo, hali ya kiuchumi ndani ya klabu hiyo kwa sasa, inatia shaka kama itaweza kuurudia mkataba ule ule wa Sunzu.

 

Kwa kawaida, baada ya kumaliza mkataba, Simba ili kuendelea kuishi na Sunzu, italazimika kumpa fedha ya dau la usajili, ambalo kwa mwaka haliwezi kuwa chini ya dola za Kimarekani 15,000 (zaidi ya Sh. Milioni 20 za Tanzania) na kukubaliana kuhusu mshahara uwe ule ule au mpya.

 

Kulingana zengwe lililotawala juu ya dola za Kimarekani 3,500 anazolipwa Sunzu kuna uwezekano Simba ikataka kuuteremsha mshahara huo, hasa ikizingatiwa kuwa, kwa sasa hakuna taarifa zozote za Mzambia huyo kutakiwa na timu, iwe ndani ua nje ya nchi.  

 

Kumalizika kwa mkataba wa Sunzu ni mtihani mwingine kwa Simba, ambayo kwa sasa inakabiliwa na kasheshe la kuingia mkataba mpya na mshambuliaji wake Mganda, Emmanuel Okwi ambaye yuko vizuri kisoka na anatolewa macho na Azam na Yanga.

 

Na suala la usajili linazidi kuwa zito kwa sababu Kamati ya Utendaji ya Simba SC wiki hii imevunja Kamati zote ndogondogo, ikiwemo Kamati ya Usajili, iliyokuwa chini ya Mwenyekiti Zacharia Hans Poppe. Chanzo; Bin Zubeiry Blog

DROGBA AOMBA KUSAJILIWA KWA MKOPO

 DIDIER DROGBA amefungua mlango wa kurudi kwenye premier league baada ya kuomba ruhusa ya kujiunga na klabu nyingine nje ya dirisha la usajili.

FIFA ilisema kwamba inafikiria ombi la mshambualiaji wa Shanghai Shenhua katika siku moja ambayo kocha wa zamani wa Chelsea Di Matteo alipofukuzwa.
  Taarifa ya FIFA ilisema: “Tunaweza kuthibitisha kwamba mchezaji Didier Drogba ametuma ombi la kuruhusiwa kusajiliwa nje ya dirisha la usajili na klabu kwa mkopo."


Drogba, ambaye aliondoka Chelsea baada ya kufunga penati ya ushindi katika fainali ya champions league, amekuwa akifikiria kurudi kufanya mazoezi na klabu yake ya zamani wakati ligi kuu ya China itakapokuwa imeisha - kitu ambacho Di Matteo alisema atakukaribisha vizuri kabla ya kutimuliwa leo asubuhi.
Kwa sheria zilizopo za FIFA haziruhusu Drogba kuhamia timu yoyote mpaka January 1.

WANAJESHI WATATU WAHUKUMIWA KUNYONGWA.

 

Askari watatu wakiwa kizimbani katika Mahakama Kuu ya Dar es Salaam jana ambapo mahakama hiyo imewahukumu kunyongwa hadi kufa baada ya kupatikana  na hatia ya kumuua Swetu Fundikira, mtoto wa mdogo wa mwanasiasa maarufu nchini Chifu Abdallah Fundikira. Kuanzia kulia ni Sajent  Roda Roberth, Koplo Ally Ng’umbe na Koplo Mohamed Ally. Picha na Venance Nestory    

MAHAKAMA Kuu Kanda ya Dar es Salaam imewahukumu adhabu ya kunyongwa hadi kufa askari watatu baada ya kupatikana  na hatia ya kumuua, Swetu Fundikira.

Adhabu hiyo ilitolewa jana na Jaji Zainabu Muruke baada ya kuwatia hatiani wanajeshi hao kwa kosa la kumuua kwa makusudi Fundikira, kinyume cha kifungu cha 196 cha Kanuni za Adhabu.

MT 1900 Sajenti Roda Robert (42) na MT 85067 Koplo Mohamed Rashid wote wa JKT Mbweni na MT 75854 Koplo Ally Ngumbe (37) wa Kikosi cha JWTZ Kunduchi, walimpiga Fundikira, Januari 23 mwaka huu  saa 7:30 usiku wilayani Kinondoni jijini Dar es Salaam na baadaye kufariki dunia usiku huohuo wa kuamkia Januari 24, mwaka 2010, katika Hospitali ya Taifa Muhimbili.

Hukumu hiyo ilifufua upya msiba wa Swetu, baada ya ndugu zake kuangua vilio, huku chumba cha Mahakama kikigeuka kwa muda kuwa sehemu ya msiba.

Sambamba na vilio hivyo, ndugu wawili wa marehemu Swetu walianguka chini na kuzirai kwa muda, kabla ya kupewa huduma ya kwanza na kurejea katika hali ya kawaida.

Akisoma hukumu hiyo, Jaji Muruke alisema ingawa hakuna ushahidi wa moja kwa moja kuwa washtakiwa hao ndiyo waliomuua Fundikira, ushahidi uliotolewa na  upande wa Mashtaka (Jamhuri) ulikuwa ni ushahidi wa mazingira, kwamba Jamhuri imeweza kuthibitisha mashtaka hayo.

Alisema kuwa anakubaliana na mtiririko wa ushahidi wa upande wa mashtaka kama ulivyoelezwa na mashahidi wake sita akiwemo daktari aliyeufanyia uchunguzi mwili wa marehemu pamoja na  askari polisi wawili ambao washtakiwa katika utetezi wao walishindwa kuuvunja.

“Sheria iko wazi ukiondoka na mtu au ukionekana naye kwa mara ya mwisho na baadaye mtu huyo akapatikana na madhara, wewe ndiyo unawajibika kutoa maelezo ya kina kuhusu yaliyompata mtu huyo,” alisema Jaji Muruke na kuongeza;

“Kisheria ukitoa maelezo ambayo hayajakidhi haja na yana utata ni faida kwa upande wa mashtaka ambao hutegemea ushahidi wa mazingira. Maelezo ya kina hayajatolewa na washtakiwa wote.”

Aliendelea,  “Ushahidi wa Jamhuri japokuwa ni wa mazingira, umejengwa thabiti na upande wa utetezi haukuweza kujenga matundu, ama kuuvunja mnyororo huo,  kidole kinawaelekea wao.”

Jaji Muruke alisisitiza kuwa katika kesi hiyo licha ya kuwa kuna ushahidi wa kimazingira, upande wa mashtaka umeweza kuthibitisha mashtaka bila kuacha mashaka.

“Hivyo kosa wanaloshtakiwa nalo limethibitishwa na Mahakama imewaona washtakiwa kuwa wana hatia ya kumuua Swetu Abdallah Fundikira,” alisema Jaji Muruke, huku akimuuliza wakili wa Serikali kama washtakiwa wana kumbukumbu zozote za makosa ya jinai.

Hata hivyo, Wakili wa Serikali Mwandamizi aliyejitambulisha kwa jina moja la Kongola alijibu kuwa hakuna kumbukumbu za makosa ya jinai kwa washtakiwa hao.

Kabla ya kutoa adhabu hiyo Jaji Muruke alimpa nafasi wakili wa washtakiwa hao, Karoli Muluge na washtakiwa wenyewe kusema lolote.

Wakili Muluge aliiomba Mahakama iwape adhabu ambayo ni nafuu kutokana  na mazingira ya kesi hiyo, kwamba umri wa washtakiwa ni mdogo, bado ni vijana ambao ni nguvukazi ya Taifa na wanategemewa na familia zao.

Mshtakiwa wa kwanza, Sajenti Robert aliiomba Mahakama impunguzie adhabu akidai kuwa mama yake ni mjane na anamtegemea na  hakuna mtu mwingine wa kumsaidia, ana watoto wadogo na pia afya yake siyo nzuri.

Hata hivyo, Jaji Muruke alilazimika kumuamuru mshtakiwa wa pili, Koplo Ngumbe kukaa chini baada kuanza kujitetea kuwa japo ametiwa hatiani, hakuhusika na mauaji hayo.

Kwa upande wake, mshtakiwa wa tatu Koplo Rashid aliiomba mahakama imwonee huruma na impunguzie adhabu akidai kuwa yeye bado ni mdogo na kwamba hilo ni kosa lake la kwanza.

Baadaye Jaji Muruke alisema kuwa ni kweli maombi ya mshtakiwa wa kwanza yanatia huruma na kwamba mshtakiwa wa tatu hata kumbukumbu zinaonesha kuwa bado ni mdogo na kwamba hilo ni kosa lake la kwanza, lakini pia kuna roho iliyopotea.

“Kama ilivyo ada, ni adhabu moja tu kwa mtu anayepatikana na hatia ya kuua kwa kukusudia na hakuna mbadala.” alisema Jaji Muruke na kuongeza;

“Hivyo mahakama hii inatamka kuwa mshtakiwa wa kwanza, mshtakiwa wa pili na mshtakiwa wa tatu mmepewa adhabu ya kifo, mtanyongwa hadi kufa.”

Baada ya kutamka adhabu hiyo Jaji Muruke alitoka katika chumba cha mahakama na ghafla ndugu wa marehemu Fundikira walilipuka kwa vilio ndani ya Ukumbi  wa Mahakama, kama vile walikuwa msibani.

Ndugu wawili wa marehemu, Mwasiti Fundikira ambaye ni dada wa marehemu na Shelina Hamisi (mpwa wa marehemu) walianguka chini na kuzirai kwa muda hali iliyowalazimu watu waliokuwa nao karibu kuwapatia huduma ya kwanza hadi walipoanza kurejea katika hali zao za kawaida.

Mwanamke mmoja aliyejitambulisha kwa jina la Lucy ambaye marehemu alimwacha akiwa na mimba, alisema kuwa alilia kwa sababu hakuamini kama haki ingetendeka.

Dada wa marehemu, Rehema Fundikira alisema kuwa alikuwa akilia kwa uchungu kutokana na jinsi ndugu yao alivyouawa kinyama.

Wakili Muluge alisema hakuridhika na hukumu hiyo na kwamba atakata rufaa.

Alisema hakuna shahidi hata mmoja aliyewaona wakimuua na kwamba hata hayo majeraha yaliyodaiwa kuwa ndiyo chanzo cha kifo cha Fundikira hakuna aliyeeleza jinsi washtakiwa hao walivyoyasababisha, kama ni kwa kumpiga au kwa namna nyingine yoyote.

Askofu Mokiwa awashambulia watengenezaji wa ARVs

ASKOFU Mkuu wa Kanisa la Anglikana Tanzania,  Dk Valentino Mokiwa 

ASKOFU Mkuu wa Kanisa la Anglikana Tanzania,  Dk Valentino Mokiwa, amesema viwanda vinavyotengeneza dawa za kupunguza makali ya ugonjwa wa  Ukimwi (ARVs),  vina siri nzito kuhusu tiba halisi ya ugonjwa huo.

Akizungumza katika uzinduzi wa semina ya kupambana  na unyanyapaa kwa wagonjwa wa Ukimwi kwa viongozi wa  Jumuiya ya Kikiristu Tanzania (CCT), iliyofanyika jana jijini Dar es Salaam, Askofu Mokiwa, alihoji sababu za viwanda hivyo kushindwa  kutengeneza dawa za kutibu kabisa ugonjwa huo na badala yake vinatengeneza dawa za kupunguza makali.


Alisema viwanda hivyo vinachelewesha kutoa tiba ya ugonjwa huo kwa makusudi, ili kuendelea kuuza dawa hizo kwa bei ya juu kwa mataifa mbalimbali.

Dk Mokiwa alisema kuendelea kwa viwanda hivyo kuchelewesha  tiba ya ugonjwa huo, ni sawa na kufanya mauaji ya makusudi.

“Haiwezekani viwanda hivyo viendelee kutengeneza dawa ya kupunguza makali ya virusi vya Ukimwi, halafu vishindwe kutengeneza dawa ya kutibu, hiyo ni njia ya kutafuta fedha,” alisema kiongozi huyo wa kidini.

Alisema  watafiti wa Kikristo kwa kushirikiana na Serikali na wadau mbalimbali,  wanapaswa kuongeza kasi ya kutafuta tiba hiyo, ili kuepuka dhambi ya mauaji ya makusudi.

“Ukimwi umegeuzwa chanzo cha watu kujitafutia fedha, kila siku tunaona watu wanaanzisha miradi na kampeni zinazogharimu fedha nyingi kwa ajili ya kupambana na ugonjwa huu huku wakisahau kutafuta tiba ya kuutokomeza,”alisema Askofu Dk Mokiwa.

Pia alisema  kuna haja ya kutunga sheria itakayowalinda wagonjwa wa Ukimwi dhidi ya vitendo vya kuwanyanyapaa, ili itoe  hukumu stahiki.

Dk Mokiwa alisema kitendo cha kuwanyanyapaa wagonjwa hao na kuwaita kuwa ni marehemu watarajiwa ni kosa la jinai linalohitaji sheria kali kulidhibiti.

Mkuu huyo wa kanisa pia alitaka  sheria ya kuwaba waajiri wanaowanyanyapaa wagonjwa hao, ili wawape kipaumbele kwa kuwa na wao wana haki ya kufanya kazi.

Aliwaomba Watanzania washirikiane katika kupambana na unyanyapaa dhidi ya wagonjwa wa Ukimwi kwani kufanya hivyo ni kutengeneza ugonjwa wa akili, hofu na ni dhambi ambayo haimpendezi Mwenyezi Mungu.

Semina hiyo imewahusisha wachungaji 33 wanaoandaa vipindi vya redio na televisheni kutoka madhehebu mbalimbali ya Kikristu.

Chanzo Mwananchi

MWANAMKE ALIEFARIKI SIMIYU AFUFUKA

MAMIA ya wakazi wa Kijiji cha  Lamadi, wilayani Busega mkoani Simiyu, juzi walifurika katika Kitongoji cha Mabulugu kumshuhudia mwanamke Ngulima Kilinga (30), aliyedaiwa kufufuka huku mwili wake ukiwa umehifadhiwa katika hospitali ya Mkula iliyopo mkoani humo.
 

Inadaiwa kuwa mwanamke huyo aliyefariki dunia tangu juzi, alionekana saa chache baadaye akiwa mzima wa afya na kuingia nyumbani kwake.

Habari zaidi kutoka katika kitongoji hicho zinasema mwanamke huyo bado amefungiwa ndani ya nyumba yake akifanyiwa dawa za kienyeji ili arudie katika hali yake ya kawaida, kwani kwa sasa anaonekana kama zezeta.

“Bado huyu yumo ndani amefungiwa, lakini saa saba za usiku wa kuamkia leo (jana) alitaka kutoka, aling’ang’ana sana ili atoke, akapiga sana mlango...wakamfanya dawa ndipo akajaribu kutulia hadi sasa bado yumo ndani na usiku alipewa chakula akala na asubuhi amepewa uji” alisema mtu wa karibu wa mwanamke huyo.

Pia inadaiwa kuwa tayari mganga wa kienyeji amekwisha kuja kwa ajili ya kutengeneza mwanamke huyo ili aweze kurudia hali yake na kwamba amewashukuru wananzengo hao kwa kuweka maiti kwenye nyumba ya mtuhumiwa huyo, kwamba hiyo ndiyo njia sahihi.

Kamanda wa Polisi mkoani Simiyu, Salum Msangi alithibitisha tukio hilo, lakini akabainisha hayo ni mambo ya imani za kishirikina.

Kamanda Msangi alisema polisi walipelekwa katika eneo la tukio kuhakikisha usalama wa wananchi na hadi saa 9:00 jioni jana, maiti ya mwanamke huyo iliyokuwa hospitali ilikuwa haijazikwa.

Jana umati mkubwa wa watu ulifurika katika Hospitali ya Mkula kulikohifadhiwa mwili wa mwanamke huyo kuushuhudia.

Ndugu wa mwanamke huyo akiwamo mumewe Ngitu Masisanga na mama yake mzazi, Mwashi Myeya walisema Ngulima aliugua ghafla juzi baada ya kukwama na mfupa wa samaki wakati akila chakula nyumbani kwake.

“Baada ya kuugua alipelekwa hospitali ambako alifariki ghafla na kuwekwa kwenye nyumba ya kuhiofadhiwa maiti’’ alisema.

Alisema  cha ajabu ni kwamba wakati wamelala nyumbani kwa marehemu sambamba na waombolezaji wengine, saa 7 usiku marehemu alitokea akiwa uchi.

Walisema marehemu huyo alimwita mtoto wake ampatie nguop na kuchukua albamu ambapo aliangalia picha.

Mashuhuda wa tukio hilo walisema kuwa mbali na kutazama picha hizo na kutaka kupewa nguo zake, pia marehemu huyo alichukua tochi iliyokuwa ikiwaka na kuizima.

Mama mzazi wa marehemu alisema, “Kabla ya kukimbia nje tulimzuia yeye kutoka nje tulimfungia mlango na sisi ndio tukakimbilia nje, licha ya kufunga mlango alikuwa akiupiga kwa nguvu ufunguke ila na yeye aweze kutoka nje, kuna mtu amefanya dawa za kienyeji ndio tunasubiri majibu.”