ENGLAND: Mgao wa mapato toka TV UNARIDHISHA Klabu zote!!

Hivi karibuni ilikuwa almanusura La Liga isianze Msimu mpya baada ya baadhi ya Klabu kuja juu zikitaka mfumo wa Mapato yanayotokana na matangazo ya Mechi laivu kwenye TV urekebishwe ili kila Klabu ifaidike ipasavywo kama vile ilivyo huko England kwenye Ligi Kuu England, BPL [Barclays Premier League].

Huko England, kwenye Ligi Kuu, makubaliano ya sasa ya maonyesho ya Mechi laivu kwenye TV ni yale yaliyoanza tangu Mwaka 2010 na yatamalizika 2013 ambayo yatamwaga Pauni Bilioni 3.5 kwa kipindi hicho, ikiwa ni Pauni Bilioni 1.17 kwa Mwaka.

Mapato hayo hukatwa Fedha za matumizi kuendesha Ligi, fungu jingine hugawiwa Vyama tanzu kama vile PFA, Chama cha Wachezaji wa Kulipwa, LMA, Chama cha Mameneja wa Timu za Ligi, Vyama vinavyoendesha Ligi za Madaraja ya chini, kama vile Conference na Football League, Chama cha Marefa na pia kwenye Vyama vinavyotoa misaada kwa Jamii.

Lakini fungu kubwa la Mapato hayo ya TV huambuliwa na kugawiwa kwa Klabu 20 zilizomo kwenye Ligi Kuu England na pia Klabu ambazo zimeporomoka toka Ligi Kuu katika kipindi hicho cha Mkataba.

Mwishoni mwa Msimu wa 2011/12, Mgao ulikuwa ni jumla ya Pauni Bilioni 1.055.

Kati ya hizo, Pauni Milioni 968.2 ziligawanywa kwa Klabu 20 za Ligi Kuu za Msimu huo na zilizobaki zilipewa Klabu 7 zilizoporomoka kutoka Ligi Kuu.

MGAWANYO HUWA:

-Mapato yote yanayotoka nje ya England hugawanywa sawa sawa kwa kila Klabu na mgao huo ulikuwa £18,764,644 kwa kila Klabu.

-Mapato yanayozalishwa ndani ya England hugawanywa ifuatavyo:

=Asilimia 50 yake hugawanywa sawa kwa kila Klabu

=Asilimia 25 yake hugawanywa kwa kutegemea Klabu ilirushwa mara ngapi laivu

=Asilimia 25 hutegemea Klabu ilimaliza nafasi ipi kwenye Msimamo wa Ligi mwishoni

Ukiangalia ule Mgao wa Asilimia 25 inayotegemea nafasi ya Klabu utakuta Wolves, waliomaliza Ligi wakiwa mkiani ambayo ni nafasi ya 20, walipewa £755,062, Blackburn, waliokuwa nafasi ya 19, walipata mara mbili zaidi ya hizo na Bolton walipata mara 3 zaidi ya hizo kwa kumaliza nafasi ya 18 huku Timu iliyomaliza nafasi ya Kwanza, Manchester City, wakizoa mara 20 zaidi ya hizo, yaani £15,101,240.

Ukichukua Mapato ya Klabu ya Kwanza, Manchester City, utakuta walizoa Jumla ya £60,602,289 na Wolves, waliomaliza mwisho, walipata £39,084,461.

Kitaalam, utaona Man City walipata Mgao mara 1.55 zaidi ya Wolves.

Huko Spain, kwenye La Liga, Real Madrid na Barcelona, huwa wanafanya Dili zao wenyewe na hawagawani na Klabu nyingine na wao hupata mara 14 zaidi ya Klabu nyingine.

Italy, kwenye Serie A, tofaitu ni mara 10 zaidi,.Ufaransa kwenye Ligi 1 ni mara 3 na nusu na Germany, kwenye Bundesliga, ni mara mbili.