Bosi amtelekeza mjamzito mgonjwa wodini muhimbili

                                                                  Bi Zena Mashaka

BINTI mmoja mwenye ujauzito wa miezi nane, Zena Mashaka ,20, (pichani) mkazi wa Urambo, Mkoa wa Tabora ametelekezwa na bosi wake katika Hospitali ya Taifa Muhimbili.
Taarifa zilizopatikana toka kwa wauguzi wa wadi namba 38, hospitalini hapo zilidai kwamba Zena aliwaeleza kuwa alikua mfanyakazi wa ndani kwa mwanamke mmoja jijini Dar es Salaam ambaye alimtoa kijijini na ameamua kumtelekeza Muhimbili akiwa mjamzito.
Wauguzi hao waliomba wasitajwe gazetini walidai kwamba, Zena amekua akizungumza vizuri lakini kuna wakati mwingine amekua akiongea mambo tofauti inaonekana alipelekwa hapo akiwa ameshachanganyikiwa.
‘Unajua huyu binti aliletwa hapa hospitali Juni 22, mwaka huu na mwanamke aliyejitabulisha kwa jina la Zainabu Ali Saidi akifuatana na polisi wa kike akidai kwamba walimkuta maeneo ya Kigamboni akiwa amechanganyikiwa,” alisema muuguzi mmoja.
Muuguzi huyo amewashauri ndugu wanaomfahamu mgonjwa huyo kwenda kumuona wodini.
Afisa Ustawi wa Jamii wa Hospitali ya Muhimbili, Mariana Kasili amethibitisha kuwepo kwa binti huyo hospitalini hapo na amewataka ndugu wajitokeze ili kumsaidia.